Do 31 de agosto ao 4 de setembro organizamos un evento en Córdoba, no que participaremos diferentes persoas e colectivos involucrados na transformación do modelo agroalimentario para avanzar cara a soberanía alimentaria. Se queres participar nel, apúntate no seguinte formulario:
Durante o segundo semestre de 2023, entre o 1 de xullo e o 31 de decembro, España vai ostentar a presidencia do Consello da Unión Europea. Neste contexto, os días 4 e 5 de setembro reuniranse en Córdoba as persoas ao cargo dos Ministerios de Agricultura de toda a Unión Europea. E iso lévanos a realizar este chamamento para dicirlles que estamos fartas:
Por un modelo agroalimentario xusto e sostíbel e un mundo rural vivo.
Soberanía alimentaria e labrega XA!
Con motivo da reunión de ministros e ministras de agricultura en setembro, facemos un chamamento para dicirlles que estamos fartas:
- Fartas de que o modelo alimentario actual baseado na agroindustria non respecte os dereitos laborais e sociais, nin os límites planetarios.
- Fartas de que as persoas produtoras e consumidoras de alimentos estean supeditadas ás políticas comerciais e agroalimentarias que as converten en meros instrumentos dos intereses da industria e da distribución alimentaria, situándoas nos elos máis febles da cadea, sen garantir prezos xustos a quen traballan a terra e ás que consumimos eses alimentos.
- Fartas de que non se garanta o dereito á alimentación a toda a poboación, especialmente aos colectivos vulnerabilizados, mentres se desperdicia unha inxente cantidade de alimentos.
- Fartas de que se sequen acuíferos e que se trate de desfacer calquera territorio con proxectos de alto impacto negativo, ou que nos inunden de pesticidas por primar un modelo agroindustrial global, que se aproveita da man de obra mal pagada e que contamina o solo, a auga e enferma ás persoas que traballan a terra, que viven no medio rural e a quen consome os seus alimentos.
- Fartas das políticas neoliberais da UE, consecuencia dos Tratados de Libre Comercio, que destrúen a soberanía alimentaria e con ela a agricultura labrega en cada recuncho do planeta, deixando de regular os mercados, especulando coa produción de alimentos, impulsando a agricultura industrial globalizada e destruíndo o planeta para beneficio das elites económicas e as multinacionais da alimentación.
Por iso, queremos facer saber aos Ministros e Ministras da Agricultura da Unión Europea que necesitamos:
- Un cambio radical das políticas públicas para apoiar un modelo de produción de alimentos baseado na sostibilidade social, económica e medioambiental, que se guíe nos principios da agroecoloxía. Necesitamos producións agroalimentarias que poñan no centro o coidado e a calidade de vida das persoas produtoras e consumidoras, o medio ambiente, o clima, o benestar animal e a sociedade no seu conxunto.
- Queremos máis agricultores e agricultoras en Europa, apostando por modelos familiares e sostíbeis, con políticas que faciliten o relevo xeracional e a incorporación da mocidade na agricultura, que manteñen vivos os nosos pobos e conservan os nosos ecosistemas, fronte ao modelo de gandaría e agricultura industrial, ao que se lle debe poñer fin.
- Que se fomente dende as institucións pola alimentación sa, sostíbel e agroecolóxica a través da compra pública.
- Que se poña no centro das políticas a defensa da biodiversidade e do territorio rural, e se priorice ás persoas que viven nel, fronte á expansión da gandaría e agricultura industriais, a minaría, os proxectos fósiles, as malas prácticas na implantación das enerxías renovábeis e a creación doutros macroproxectos que atentan contra a integridade e a soberanía do territorio.
- Que se desenvolvan políticas que favorezan contornos sociais, de produción e consumo inclusivos con perspectiva feminista e respecto dos dereitos laborais das persoas traballadoras agrícolas.
- Que se aposte por ofrecer servizos públicos e de calidade no medio rural.
- E, en definitiva, que se fomenten os contornos alimentarios saudábeis que manteñen con vida os nosos pobos e ecosistemas e que se fortalezan os procesos de deliberación dende unha cidadanía informada e responsábel para afrontar os retos que aquí propoñemos.
Sumarte a este chamamento como organización, colectivo ou experiencia de produción e consumo.
Informarte da Axenda do Campamento de formación e activismo do movemento pola Soberanía Alimentaria, que terá lugar en Córdoba, do 31 de agosto ao 4 de setembro.
Inscribirte ao Campamento.
Córdoba, do 31 de agosto ao 4 de setembro. Complejo Rural Río Secreto (Hornachuelos, Córdoba) a 30-35min de Córdoba capital
Neste campamento traballarase en dous eixes complementarios: 1) estratexias e técnicas de acción directa non violenta (ADNV) dentro do movemento alimentario, e 2) articulación do movemento alimentario. Cada un destes eixes ten actividades propias e apuntamos cara a unha maior mobilización e activación do movemento agroalimentario tanto nas formas de acción colectivas e de incidencia, como na articulación das organizacións do propio movemento pola soberanía alimentaria e agroecoloxía. As actividades de formación de ADNV constarán de diversos obradoiros sobre teoría e práctica de accións, tácticas de desobediencia civil, traballo en equipo e cuestións legais. A parte de articulación de organizacións traballarase mediante escenarios de futuro e proxección de estratexias colectivas.
Á súa vez, teremos momentos máis distendidos pero cargados de intención e experiencia como son os “Conversatorios”: espazos de reflexión colectiva e diálogo a partir da presentación dalgunhas experiencias e procesos de mobilización do movemento alimentario. Son espazos abertos a todas as asistentes, nas que poder compartir e dialogar sobre a temática e a experiencia de cada sesión nocturna.
O sábado, aproveitando que se celebra o Ecomercado de Córdoba, liderado polas produtoras agroecolóxicas de Córdoba, iremos á cidade para encontrarnos colectivamente.
E o luns, como colofón, aproveitaremos que as representantes dos Ministerios de Agricultura europeos están en Córdoba para dicirlles: Até aquí chegamos! Plantámonos!
Programa
Horarios aproximados: Mañá (9-13h), Tarde (17-21h), Conversatorios (22:30h)
- Mañá: Chegada das primeiras participantes.
- Tarde: Espazo de formación activista ADNV.
- Noite: Conversatorio do Movemento agroalimentario, movemento ecoloxista e repertorios de protesta.
- Mañá: Formación activista ADNV.
- Tarde: Escenarios de futuro – As organizacións do movemento que se encontren.
- Noite: Conversatorio – Experiencias de mobilización agroalimentaria e ecoloxista en España e Europa.
- Visita ao Ecomercado de Córdoba: mercado agroecolóxico, arte, música, exposicións, etc.
- Tarde: Formación activista ADNV.
- Noite: Conversatorio – Experiencias de mobilización agroalimentaria e ecoloxista en España e Europa.
- Mañá: Taller de organizacións do movemento pola soberanía alimentaria e agroecoloxía: enerxías, forzas, temáticas, estratexia.
- Tarde: Formación activista ADNV.
QUEN SOMOS?
Somos un grupo de organizacións que apostamos por un modelo agroalimentario xusto e sostíbel e un mundo rural vivo.
ORGANIZACIÓNS DE APOIO
contacto
Se tes calquera dúbida ou suxestión podes escribirnos ao noso correo: soberania.alimentaria@tierra.org
